இந்த இதழில் ஒரு அதிசய மனிதரைப் பற்றிப் பார்க்கப் போகிறோம். சுமார் 100 ஆண்டுகளுக்கு முன் உலகை சுற்றிய இவர் அனுபவங்கள் மிகவும் அற்புதமானவை. சுத்த சைவர். அன்றைய ஐரோப்பிய அமரிக்க தேசங்களில் கப்பல் பயணம் செய்து அத்தனை பிரபலத் தலைவர்களையும் தம் புகைப்பட கருவியிலும், திரைப்படக் கேமிராவிலும் படம் எடுத்திருக்கிறார் என்பதை கேட்பதற்கே வியப்பாக இருக்கிறதுஅவர் எப்படி தேசப்பற்று மிக்கவராக இருந்தார் , சமுதாய அமைப்பு அரசாங்கத்தின் பொறுப்பு , மக்களின் கடமை இவற்றை பற்றி எல்லாம் கூட தெளிவான சிந்தனை இருந்திருக்கிறது என்பதை படிக்கும் போது தமிழராகிய நமக்கு பெருமையாக இருக்கிறது.
இரண்டாவது பக்கத்தில் இந்தியாவிலேயே உள்ள தனித்தன்மை வாய்ந்த ஒரு அருங்காட்சியகம் , கோவை நகரத்தில் அனைத்துத் தர மக்களுக்காகவும் ஏற்படுத்தப்பட்டிருக்கும் பூச்சிகள் பற்றிய அறிவியல் கண்காட்சியகம்.
வாழ்க்கை நெறியில் குமரகுருபரர் சொல்லும் முக்கிய கருத்து கல்வி கற்பதை மட்டும் எக்காலத்திலும் கைவிடக்கூடாது. ஒரே ஒரு விஷயத்தில் மட்டும் மனிதர்கள் ஒப்பீடு செய்து கொள்ளலாம், தம்மை விட அதிகம் கற்றவர் அல்லது திறமைப் பெற்றவர்களை கண்டு தாமும் அவர் போல் ஆக வேண்டும் என்று ஆவல் கொள்ள வேண்டுமே அன்றி பிறர் செல்வ வளத்தைக் கண்டு அல்ல என்பதை காரணத்தோடு விளக்குகிறார்.
